‘भला उसकी कमीज मेरे कमीज से सफेद कैसे ?

काही वेळा असं वाटतं की,आपल्याकडे दोन इंडियन पीनल कोड आहेत. एक आयपीसी व्हाइट -सेलेब्रिटी आणि व्हि.आय.पी.यांच्यासाठी आणि दुसरा आयपीसी ब्ल्यू -तुमच्या आमच्यासारख्या सर्वसामान्य लोकांसाठी !
२००१ सालच्या मे महिन्यातील एका रात्रीची गोष्ट.जुहूच्या एका रस्त्यावर फरदीन खानला अटक करण्यात आली.झडती घेतल्यावर त्याच्या खिशातून काही ग्रॅम कोकेन हस्तगत करण्यात आले.मुंबईच्या फिल्मी विश्वाला हादरवून टाकणारी ही बातमी बहुतेक सगळ्याच वृत्तपत्रांच्या पहिल्या पानावर छापली गेली.चाहत्यांची गर्दी कोर्टात झाली.अपेक्षेप्रमाणे त्याची ताबडतोब जामिनावर सुटकाही झाली.खटला उभा राहण्यासाठी दहा वर्षं लागली.गेल्या वर्षी २०११ साली फरदीनवरचे आरोपपत्र कोर्टासमोर आले.मामुली प्रमाणात अमली पदार्थ विकत घेण्याच्या आरोपाखाली खटला पुढे चालवण्यात आला.या वर्षी फरदीन मार्च महिन्यात कोर्टापुढे हजर झाला.कोर्टासमोर त्याने निवेदन दिले की,तो आता व्यसनमुक्त झाला आहे.कोर्टाने त्याचे निवेदन स्वीकारून कलम ६४ (अ) NDPS अ‍ॅक्ट १९८५ ची तरतूद वापरून या खटल्यातून अभय दिले आणि मुक्त केले.
अंमली पदार्थाची केस -दहा वर्षांनी कोर्टासमोर यावी - अकराव्या वर्षी त्यातून अभय मिळावे.सगळं काही सोयीचं- सुरळीत आणि सुटसुटीत.
*****

ही बातमी वाचताना २०-२२ वर्षांपूर्वीची एक बातमी आठवली. मुंबईच्या एका मिल कामगाराची रात्रपाळी सुटल्यावर गेटवर झडती घेण्यात आली.त्याच्या खिशात पंधरा ग्राम टिनोपाल सापडले- टिनोपाल म्हणजे पांढरे कपडे झगमगीत कराण्याची एक साबणासारखी पावडर.त्याची रवानगी ताबडतोब पोलीस ठाण्यात झाली. पोलीसांनी गुन्हा दाखल करून त्याची रवानगी कोर्टात आणि कोर्टानं त्याची रवानगी न्यायालयीन कोठडीत केली.त्या कामगाराची परिस्थिती जेमतेमच असल्याने सरकारतर्फे वकील मिळून खटला उभा रहायाला काही दिवस गेले.कोर्ट जामीन द्यायला तयार झाले,पण त्याचा जामीन कोणी देईना.सहा महिने तुरुंगात काढल्यावर खटला उभा राहिला आणि तीन महिन्यांची शिक्षा झाली.
अंमली पदार्थ बाळगले तर चांगल्या वर्तणुकीच्या हमीवर अभय आणि १५ ग्राम टिनोपाल चोरलं तर सहा महिने जेलात !
आता तो कामगार कुठे असेल किंवा असेल की नाही काही माहिती नाही, पण असलाच कुठे तरी आणि फरदीनची केस त्यानं वाचली, तर एकच प्रश्न त्याच्या मनात उभा राहील, ‘भला उसकी कमीज मेरे कमीज से सफेद कैसे ?’