गणरायाला चढवा निरनिराळ्या वस्त्रांचा साज..

एक जाडसर कागद किंवा कार्ड घेऊन त्याला मधोमध घडी घाला. फूल जितकं मोठं हवं तितकी या घडीची रूंदी हवी. या घडीच्या मधोमध चित्रात दाखवल्याप्रमाणं साधा धागा ठेवा आणि घडीच्या भोवती वात गुंडाळा. ही गुंडाळी करताना वात जास्त ताणूही नका कारण मग वात तुटेल पण मग वात सैलही सोडू नका. तितकं दाट फूल हवं, तितके वळसे घालून झाल्यानंतर शिल्लक वात कापून टाका.  वातीची गुंडाळी घडीतल्या धाग्यासोबतच  एका बाजूने बाहेर काढा.  आता या मधल्या धाग्याला  हलकीशी गाठ मारा आणि गुंडाळीच्या पाकळ्या विलग करत त्याचं छानसं फूल बनवा. पाहा, आहे की नाही सोप्पं?

इथून पुढे सगळा आपापल्या कल्पनाशक्तीचा खेळ आहे. एकदा का  वरच्या कृतीप्रमाणे  बेसिक फुल तयार झालं, की वेगवेगळ्या प्रकारांनी वेगवेगळी फुलं तयार करता येतात.  हे वरच्या चित्रात आहे साधं फूल. हे पाहून तुम्हाला वेगवेगळी फुलं कशी तयार करायची याची कल्पना येईल. 

तर वरच्या चित्रात दाखवल्याप्रमाणं आधी मुळापाशी दोन-दोन उभे खांब एकत्र धरून त्यांना कलाबतूच्या म्हणजेच चकचकीत तुकड्यांने गुंफायचं. या कलाबतूचीही एक गंमत आहे की ते तुकडे एकमेकांना आपोआप चिकटतात, त्यासाठी वेगळा गोंद वापरायची गरज नाही. त्यामुळं पातळशा छोट्या पट्ट्यांमुळं फूल छान दिसतं. 

वरच्या भागासाठी एकआड-एक वातीची पाकळी एकमेकांत गुंफून पुन्हा एकदा दुसर्‍या रंगाच्या कलाबतूने पाकळ्या बांधल्या की मस्त फूल तयार होईल. शेवटी मधोमध एखादी रंगीत टिकली लावली की फूल तयार.

तर, वरती म्हटल्याप्रमाणे थोडी कल्पनाशक्ती लढवून वेगवेगळी फुलं तयार करता येतील.  फुलपाखरू, बाहुली, ब्रह्मकमळ... अगदी काहीही..  वरची फुलं फक्त नमुना आहेत. गज्जी वस्त्रे म्हणून यूट्यूबवरती सर्च मारलात की बरेच व्हिडिओही मिळून जातील. 

ही फुलं कलाबतूच्या धाग्यांनी एकत्र गुंफून यांचे छान हार तयार होतात. दोन फुलं एकत्र जोडताना त्यांच्या पाकळ्या बेगडी तुकड्यांनी एकत्र जोडत जायचं.. यातून आपल्याला हव्या त्या जाडीचा आणि हव्या त्या लांबीचा हार बनेल. 

 या गणेशोत्सवात तुम्ही गणपतीला रोज वेगवेगळा हारही घालू शकाल.

वरच्या हारांच्या तुलनेत हा सोपा प्रकार आहे. वस्त्रांची प्रत्येक गाठ वेगळी बनवायची. तिच्या मुळाशी ओल्या कुंकवाचा रंग किंवा फॅब्रिक कलर द्यायचा. तो सुकला की वरच्या भागावर ओल्या हळदीचा किंवा पिवळा रंग द्यायचा. हार बनवण्यासाठी इंग्रजी यू  आकाराचा मजबूत भाग कापून त्यावर या रंगवलेल्या  गाठी फेविकॉलने चिकटवायच्या. नंतर पाठीमागे फक्त दोरी बांधली की काम झालं.

हा वस्त्राचा आणखी एक सोपा प्रकार आहे. वस्त्राची लांबलचक माळ बनवून नंतर तिचे दोन-दोन गाठींचा एक, असे होतील तितके तुकडे करायचे. असे तीन तुकडे एकत्र करून छान टप्पोरं फूल तयार होतं. ही फुलं एखाद्या जरीच्या धाग्यावर चिकटवली की काम फत्ते!!

मग मंडळी, करून पाहणार ना ही वस्त्रं? चला तर मग, आत्ताच तयारीला लागा. गणेश चतुर्थी जवळ येतेय...