पूर्वी एवढ्या कमी किमतीत मिळायच्या गाड्या... या किमती बघून चक्कर येईल भौ!!

शेवर्ले (वर्ष - १९३६)

शेवर्ले कारची किंमत १९३६ साली चक्क ३,६७५ होती. आज मात्र एका शेवर्ले कारसाठी जवळजवळ ५ लाख तरी मोजावेच लागतात.

स्टडबेकर चॅम्पियन (वर्ष-१९४८)

स्टडबेकर कंपनी आता बंद झाली, पण तिच्या प्रसिद्धीच्या काळात या कंपनीची कार भारतात ११,००० पर्यंत मिळत होती. 

हिंदुस्तान मोटर्सची लँँडमास्टर (वर्ष - १९५५)

हिंदुस्तान मोटर कंपनीची अँबॅसिडर कार प्रसिद्ध होती. याच कंपनीचे आणखी काही मॉडेल्स प्रसिद्ध होते, त्यातलीच एक कार म्हणजे 'लँँडमास्टर'. भारतात १९५५ साली लँँडमास्टर फक्त ९,८४५ रुपयांना मिळत होती यावर तुमचा विश्वास बसेल का ?

डॉज (वर्ष-१९५४)

डॉज ही अमेरिकन कार कंपनी एकेकाळी अत्यंत प्रसिद्ध होती. पण आता ती फियाटच्या मालकीची झाली आहे. या कारची भारतातली किंमत होती १८,७४० रुपये.

फोर्ड (वर्ष - १९३७)

ही जाहिरात तर हिंदीत आहे राव. त्याकाळी कारची जाहिरात कशी असायची याची एक मस्त झलक यात मिळते. या जाहिरातीत आपल्याला दोन किंमती दिसतात. 

टुरिंग कार - २५२५

६ खिडक्या ४ दारांची सेडान - ३३५०

राव, आजच्या काळात तर या किमतीत सायकल येते !! 

फियाट ११०० (वर्ष-अज्ञात)

या जाहिरातीत वर्ष दिसत नसलं तरी आपण अंदाज लावू शकतो.  फियाटने 'फियाट ११००' कारचं उत्पादन १९५३ ते १९६३ पर्यंत केलं. म्हणजे ही जाहिरात या दरम्यानची आहे. भारतात ११०० मॉडेल जोरदार चाललं. एकवेळ अशी आली की अँबॅसिडरच्या बदल्यात लोक ११०० घेऊ लागले. या कारची भारतात किंमत होती ९,७५० रुपये फक्त.

लँब्रेटा ४८ (वर्ष-१९६१)

कार जशा १५००० च्या आत मिळायच्या, तशाच मोटारसायकल्ससुद्धा आजच्या हिशोबाप्रमाणे कमी किमतीत होत्या. आता 'लँब्रेटा'चंच उदाहरण घ्या. ही मोटरसायकल १९५४ पासून बाजारात आली. भारतात याची किंमत फक्त ७९० रुपये होती. सोबतीला जुन्या हमाम साबणाची जाहिरातही तुम्ही पाहू शकता. 

राव, कार्स, मोटारसायकल्स ह तर आपण बघितले.. पण आता बघूया या सर्वांना चालवणारं पेट्रोल किती रुपयांना पडत होतं. आजच्या काळातील किमतीशी ही किंमत अगदीच विसंगत आहे भौ.

१९६३ साली ५ लिटर पेट्रोलसाठी फक्त ३ रुपये द्यावे लागायचे. हे तर अगदीच अविश्वसनीय आहे . आपल्याकडे तर आता ३ रुपयांना चॉकलेटसुद्धा मिळत नाही.

मंडळी, ज्या काळात लोकांचा पगार १० रुपये किंवा १०० रुपये होता, त्याकाळात हे भाव अगदी आवाक्याबाहेर होते. कदाचित आज जे भाव आहेत तेही पुढील ५०-६० वर्षांनी क्षुल्लक वाटतील. हे तर चालतच राहणार राव. तुमच्याकडे जुन्या गाड्यांबद्दल अशीच रोचक माहिती असेल तर आम्हाला नक्की सांगा !!