अखेरचा गोल... खेळाडूंनी मित्राला वाहिलेली श्रद्धांजली पाहून तुमचे डोळेही भरून‌ येतील...

कधीकधी इंटरनेटवर अशा गोष्टी वायरल होतात ज्या आपल्याला अगदी स्तब्ध करून टाकतात. असाच एक व्हिडिओ सध्या सोशल मिडियावर फिरतोय, ज्यात फुटबॉल खेळणाऱ्या तरूणांचा समूह आपल्या मृत संघमित्राला अशा आगळ्यावेगळ्या पध्दतीने निरोप देताना दिसत आहे.

अवघ्या ५४ सेकंदांचा हा व्हिडिओ आहे. त्यात दिसतं एका गोल पोस्टजवळ एक शवपेटी ठेवण्यात आलीय. सभोवती संघातले सर्व सहकारी थांबलेले आहेत. एक तरूण दुसऱ्या तरूणाकडे बॉल पास करतो आणि दुसरा तरूण तो बॉल त्या शवपेटीकडे ढकलतो. बॉल त्या शवपेटीवर आदळून गोल पोस्टमध्ये जातो आणि गोल होतो! खुश झालेला प्रत्येकजण त्या शवपेटीच्या दिशेने धावत जातो आणि तीला कवटाळून रडू लागतो. त्यांच्या सहकाऱ्याने केलेला हा अखेरचा स्कोर होता.