कॉर्पोरेट जगतातल्या कथा फक्त नफा-तोटा आणि बोरिंग बोर्ड मीटिंग्सपुरत्या मर्यादित असतात वाटत असेल तर 'Made in India: A Titan Story' पाहिल्यावर हा समज पूर्णपणे बदलेल. ही केवळ एका ब्रँडची गोष्ट नाही, तर ती एका जिद्दीची आणि भारतीय अस्मितेची कथा आहे.
आज २९ जुलै, आधुनिक भारताचे शिल्पकार जेआरडी टाटा यांची १२२ वी जयंती. या निमित्ताने जर तुम्ही काही खास पाहण्याचा विचार करत असाल, तर 'Made in India: A Titan Story' ही वेब सीरिज तुमच्यासाठी मस्ट-वॉच आहे.
जेआरडी टाटांचा वारसा आणि आजचा दिवस-टाटा समूहाने भारताला केवळ उद्योग दिले नाहीत, तर स्वाभिमान दिला. आजच्या दिवशी आपण जेआरडींच्या त्या दूरदृष्टीला सलाम करतो, ज्यांनी एअर इंडियापासून ते टायटनपर्यंत अनेक जागतिक दर्जाचे ब्रँड्स उभे केले.टाटा हे नाव भारतीयांसाठी विश्वासाचा समानार्थी शब्द आहे.
'Made in India: A Titan Story' का पाहावी?-ॲमेझॉन एमएक्स प्लेयरवर (Amazon MX Player) उपलब्ध असलेली ही सहा भागांची सीरिज विनय कामथ यांच्या पुस्तकावर आधारित आहे. ही कथा आहे झेरक्स देसाई (Xerxes Desai) यांची,ज्यांनी जेआरडी टाटांच्या मार्गदर्शनाखाली शून्यातून 'टायटन' उभे केले. ज्या काळात परदेशी घड्याळांची तस्करी व्हायची, त्या काळात एका भारतीय कंपनीने स्विस कंपन्यांना टक्कर दिली.
या सीरिजमध्ये दिग्गज अभिनेता नसीरुद्दीन शाह यांनी जेआरडी टाटांची भूमिका साकारली आहे. त्यांचा वावर आणि संवादफेक पाहून प्रत्यक्ष जेआरडी समोर उभे असल्याचा भास होतो. तर झेरक्स देसाईंच्या भूमिकेत जिम सर्भने पुन्हा एकदा आपली छाप पाडली आहे.
मराठी प्रेक्षकांसाठी एक खास आकर्षण-या सीरिजमध्ये मराठी अभिनेता वैभव तत्ववादी याने 'आकाश बन्सल' ही महत्त्वाची भूमिका साकारली आहे. मराठी कलाकारांचा बॉलिवूड आणि ओटीटीवरील वाढता प्रभाव अभिमानास्पद आहे. दिग्दर्शक रॉबी ग्रेवाल यांनी ७०-८० च्या दशकातील बॉम्बे आणि कॉर्पोरेट कल्चर अतिशय बारकाईने उभे केले आहे.
आजच्या काळातले महत्त्व- ही सीरिज केवळ उद्योजकांसाठी नाही, तर प्रत्येक भारतीयासाठी प्रेरणादायी आहे. टाटा समूहाचे सध्याचे अध्यक्ष एन. चंद्रशेखरन यांनी नुकत्याच दिलेल्या निवेदनात म्हटले आहे की, 'टाटांची गुंतवणूक ही केवळ व्यवसायासाठी नसून ती राष्ट्रनिर्मितीसाठी आहे.' हेच तत्त्व या सीरिजच्या प्रत्येक फ्रेममध्ये जाणवते.जर तुम्हाला 'रॉकेट बॉईज' सारख्या सीरिज आवडल्या असतील, तर 'टायटन' तुम्हाला निराश करणार नाही. यात केवळ यश नाही, तर अपयश, नोकरशाहीचे अडथळे आणि त्यातून मार्ग काढण्याची जिद्द आहे.
आज जेआरडी टाटांच्या जयंतीनिमित्त हा स्वप्नांचा हा प्रवास नक्की अनुभवा. एका जागतिक ब्रँडच्या निर्मितीची ही गाथा पाहताना तुमची मान अभिमानाने नक्कीच उंचावेल.एका महान व्यक्तीच्या कर्तृत्वाला समजून घेण्याची यापेक्षा चांगली संधी दुसरी कोणती असू शकते?
