जगातील सर्वोत्तम बँकांची यादी दरवर्षी प्रसिद्ध करणाऱ्या Global Finance या आंतरराष्ट्रीय आर्थिक नियतकालिकाने स्टेट बँक ऑफ इंडिया (SBI) ला ‘World’s Best Consumer Bank’ — जगातील सर्वोत्तम ग्राहक बँक हा बहुमान दिला आहे.
या पुरस्काराचे वैशिष्ट्य म्हणजे, सर्वोत्तम बँक ठरवताना केवळ तिचा आकार, व्यवसायाची व्याप्ती किंवा आर्थिक उलाढाल विचारात घेतली जात नाही. ग्राहकांना दिल्या जाणाऱ्या सेवेचा दर्जा, जोखीम व्यवस्थापनाची कार्यक्षमता आणि कॉर्पोरेट गव्हर्नन्समधील सर्वोत्तम पद्धती यांनाही महत्त्व दिले जाते.
म्हणजेच, बँक किती मोठी आहे यापेक्षा ती किती विश्वासार्ह आहे, ग्राहकांच्या गरजा किती प्रभावीपणे पूर्ण करते आणि आर्थिक आव्हानांना किती समर्थपणे तोंड देते, यावर तिचे श्रेष्ठत्व ठरते.
भारतीय बँकिंग क्षेत्रासाठी आणि देशातील कोट्यवधी SBI ग्राहकांसाठी ही निश्चितच अभिमानाची बाब आहे.
बँकेचे ५२ कोटींहून अधिक ग्राहक आणि देशभरातील विस्तृत शाखा-जाळे यांचा या गौरवामागे महत्त्वाचा वाटा आहे.
पण भारतातल्या सर्वसामान्य ग्राहकाचा अनुभव थोडा वेगळाच आहे.
SBI म्हटलं आठवतो—त्यांचा पवित्र मानला जाणारा लंच ब्रेक,
बॅंकेतल्या कधीही न संपणाऱ्या रांगा,
न विसरता वेळोवेळी "गायब" होणारा सर्व्हर,
आणि कर्मचाऱ्यांचा निवांत स्वभाव.
या सगळ्या अनुभवांमधूनच सोशल मीडियावर असंख्य भन्नाट विनोद, टोमणे आणि मीम्स जन्माला आले आहेत. त्यातले काही मोजके विनोद आज वाचा !
१ ) SBI चा सर्व्हर!
ग्राहक: "साहेब, सकाळपासून सर्व्हर बंद आहे. तो कधी सुरू होणार?"
SBI कर्मचारी: "मित्रा, हा सर्व्हर म्हणजे अगदी देवासारखाच आहे."
ग्राहक: "म्हणजे सर्वव्यापी आणि सर्वशक्तिमान?"
SBI कर्मचारी: "नाही... त्याला व्यवस्थित चालताना कुणीच पाहिलेलं नाही.पण तरीही त्याच्यावर श्रद्धा ठेवावीच लागते!"
२) SBI चे योनो ॲप आणि OTP
वापरकर्ता: सकाळी १०:०० वाजता "Send OTP" वर क्लिक करतो.
दरम्यान त्याच्या आयुष्यात...
लग्न होतं...
मुलं होतात...
ती मोठी होतात...
तो निवृत्तही होतो...
आणि मग...एक दिवस निजधामाला जातो
तेराव्याच्या रात्री ११:३० वाजता, फोन वाजतो...
मोबाईल: "आपला SBI OTP आहे: 4582.
३ ) प्रतीक्षा!
मुलगा : "बाबा, आज मला घरी परतायला खूप उशीर होऊ शकतो."
बाबा : "किती उशीर? दोन-तीन तास?"
मुलगा : "दोन-तीन तास... किंवा दोन-तीन वर्षंसुद्धा लागू शकतात बाबा !
मी SBI च्या शाखेत कागदपत्रं जमा करायला चाललो आहे!"
